Из записок моего деда Алексея Гавриловича Хамицаева:
- Гидтӕ ӕма Мерет
Дзагурти ӕнсувӕртӕ: Дафа, Пуца, Борнӕф ӕма сӕ кӕстӕр – Баса адтӕнцӕ цӕрунгъон хӕдзарӕ, цардӕнцӕ Киристонгъӕуи (нури Дигоригъӕуи).
Уонӕн алкӕмӕндӕр си адтӕй сувӕланттӕ. Ӕнсувӕртӕ сегасдӕр сӕ дуйнейӕй рацохӕнцӕ. Сӕ кизгудтӕ киндзити рандӕнцӕ алли ‘рдӕмити. Сӕ фурттӕ ниххӕлеуӕнцӕ алли горӕтти, ка си Мӕскуй цӕруй, ка Украини, ка мӕнӕ нӕхемӕ Орджоникидзей. Киристонгъӕуи си цӕргӕ байзадӕй Пуцай уосӕ Мерет, цӕудзӕнӕй ибӕл 70 анзи фулдӕр, уӕдта Басай уосӕ Гидтӕ, уобӕл дӕр нур цӕудзӕнӕй 70 анземӕ хӕстӕг.
Цӕрунцӕ еумӕ, федауцӕй, кӕрӕдзебӕл бухст нӕфӕразунцӕ, зӕгъгӕ, куд фӕззӕгъунцӕ, уотӕ.
1957 анзи, январи маи Гидтӕ, еу бон кӕми адтӕй, уоми рандӕй дӕллаг синхмӕ ӕ хуӕртӕй еуей бӕрӕг кӕнунмӕ. Ӕвӕдзи ‘бӕл уоми ӕ хуӕрӕмӕ ӕгӕр раирӕгӕмӕй. Мерет нӕбал фӕггӕдзӕ кодта ӕма рауадӕй Гидти агорунмӕ. Сӕ дӕлтегътӕмӕ нӕма нихъхъӕрдтӕй, уотӕ рауидта, дӕлӕ Гидтӕ ке исцӕуй, уой. Мерет ӕ цъухтохӕн арф ӕ цӕстити уӕнгӕ ӕргӕлста ӕма Гидтӕбӕл фӕйеуварс кодта. Минкъий ниууадӕй дӕлӕмӕ, уӕдта фӕффӕстӕмӕ ‘й. Нур Гидтӕ ба сӕ хӕдзарӕмӕ ӕ цӕуни куст кӕнуй.
Мерет тагъд-тагъдӕй исуадӕй ӕма Гидтӕмӕ фӕллӕудтӕй ӕма имӕ дзоруй:
— Дӕ фӕндаг раст, Гидтӕ!
— Зӕрдирай рауо, — зӕгъгӕ, имӕ дзоруй Гидтӕ дӕр.
— Куд айтӕ, ци айтӕ, дзӕбӕх айтӕ?
— Мах дӕр дзӕбӕх ан хуцауи фӕрци аци сахат.
Мерет фӕууагъта Гидти ӕ фӕсте ӕма фӕууайуй, цума ‘й хъӕбӕр нӕ евдӕлуй, уотӕ. Уалдӕнги Гидтӕбӕл фембалдӕй еу кизгӕ ӕма ‘й Гидтӕ рафарста:
-Кизгӕ, уӕлӕ дӕбӕл ка рамбалдӕй, е ба ке уосӕ ‘й?
— Магъа, Дзагурти зӕронд уоститӕй кадӕр ӕй, ӕнгъӕлдӕн Гидтӕ ‘й.
— Гидтӕ мӕхуӕдӕг бӕргӕ дӕн, фал уой ба нӕ бафӕсмардтон…
Уотемӕй Гидтӕ сӕ хӕдзарӕмӕ исхъӕрттӕй. Мерет ӕй ку рауидта, уӕд ибӕл ниццийнитӕй.
— Уо гӕлӕхха Гидтӕ, айсонгӕй мин кӕми фесӕфттӕ, бухстбӕл ке нӕфӕразун уой ку зонис, уӕд уотӕ ӕрӕгӕмӕ цӕмӕн бакодтай, зӕгъгӕ, — Мерет гириз кӕнуй Гидтӕбӕл.
— Магъа, хуцау мӕ фесафӕд, кӕд ду дӕр мӕ зӕрдӕбӕл фондз хаттемӕй минкийдӕр ӕрлӕудтӕ, уӕд. Фал мӕ гъӕунги еу уосӕ ӕруорамуй, уӕд иннӕ уосӕ, уотемӕй си мӕ уод нӕбал адтӕй. Мӕнӕ нӕ тӕккӕ дӕлтегъӕ ба мӕ еу уосӕ исӕйафта, ӕма мӕ уӕхӕн дзӕбӕх, ӕхсидзгон, лӕмбунӕг фӕрститӕ ракодта, куд айтӕ, ци айтӕ, загъта… Куд фӕлмӕн дзубандитӕ мин ракодта, куд. Фал ӕй фӕрсун нӕбал бандиудтон, ке уосӕ дӕ, зӕгъгӕ.
— Гъома, Гидтӕ, ду дӕр дессаг дӕ, нур дӕ еци уосӕ уотӕ лӕмбунӕгӕй кӕд фӕффарста, уӕд ду уой цӕмӕннӕ бафарстай, ка дӕ, зӕгъгӕ?
10.09.1958.